قماري الريد
تاليف .د.عبد العظيم اكول
من انت سافرت ومشيت
عشت الرتابة مع الملل
سافرت في بحر الهموم
انا في هواك مالاقي حل
مطر الشجون جواي هطل
ومصيبتي في سفرك جلل
انا حالي كيف بعد السفر
ما دمعي بحكي عن الحصل
لوعة واسي وحرقة قلب
انا فاقدك انت محل محل
رحلت طيور الامنيات
حتي الكنار بعدك رحل
لكني مافاقد العشم
مادام هناكا بصيص امل
باكر قماري الريد تعود
شايلة المودة اليك تصل
تهديك ينابيع من حنانك
من زول حنييين عنك سال
ماعندو غير حبك دوا
وما ليه غير ريدك اهل
بعشق عيونك والصباح
بهواكا من زمن الجهل
ودعتك الله وكون بخير
مرسالي ليك باكر يصل
بلقاكا في الحرز الامين
تسرج خيولك لي زحل
انجم هواك تبرق سنا
شوق العيون بحكي الحصل
دعواتي تبراك يا جمييل
يا خلية بتنقط عسل
……………………………….
الشوق كتير
كلمات .د.عبد العظيم اكول
بعشق عيونك يازاهي
ودايما عليك متشفق
بقطع معاك بحر الريدة
الشوق كتير كدة متدفق
ارواحنا ما اظن تتلاقي
وماشفنا ايد واحدة تصفق
ماقالو مرة في امثالنا
العين بصيرة واليد قصيرة
بهواكا مهما تعذبني
اشواقي في ريدك اسيرة
لو درت تعرف عن حالتي
غالبني اعرف تفسيرا
ولما الفراق يحصل مرة
مرات بكون سببو الغيرة
اصلو الولف شوق بتنامي
في لحظة بغلب شراحو
ما انت شوفتك بالدنيا
قول ياهموم يلا انزاحو
ما انت عارف بالفيني
قلبي الحنين نازفة جراحو
وكتين يصادفك لو صدفة
في الدنيا تنبت افراحو
ما دام حكمت علي اشقي
وجافيتني تاني بلا سبة
ياريت تخت مرة في بالك
افراحي بيك زايدة محبة
قلبي البريدك يوماتي
في ثانية عنك ما غب
مادمت طول عمرك جافي
اطراني مرة ولو حبة
