*وقد يكون الطريق قد اخد فولكلر
*كلو جائز
*وفي البلد دي الشيطان ذاتو ما غريب
*ياخ ماء غريب ماغريب
*عادي
*نطالب الجيش بتغيير عقيدته
*يعني يشيل قصة يحكم دي من راسو
*ولكن لماذا لانطالب الاحزاب والسياسيين بتغيير عقيدتهم وطريقتهم التي ودرت البلد دي وجهجهت الامة من خروج الانجليز والي خروج حمدوك؟؟؟
*الانجليز مماخرجوا خرجت معاهم البركة
*بدأ جنيهنا تدهور مريع
*لسوء ادارتنا وضعف ارادتنا ضعينا بلدنا
*وادينا بس التنظير والنقة
*اما الحسد
*فهو الصفة الوحيدة التي جمعتنا كلنا
*اي شي بنختلف فيهو الا الحسد
*بنتفق عليهو بمفهوم عليا وعلي اعدائي
*اهل الانقاذ ما اجانب
*سودانيون
*وكان لهم شرف تحطيم مشروع الجزيرة والصناعات المرتبطة به حتي لو تحويليه وسودانير و الخطوط البحرية والنقل النهري وسكك حديد السودان والصناعات الوطنية والنفس البشرية
*سودانيون هم وحطموا كل ذلك
*وكل ذلك عملوهوا الخواجات الكفار
*اللهم شتتهم شتتا وبددهم بددا وماتخلي فيهم احدا
*تلك هي دعواتنا من خلال المنابر
*ومكبرات الصوت التي نطلق دعواتنا من خلالها
*فكرة خواجية وصناعة خواجية وقد تكون قد قدمت لنا عونا انسانيا منهم
*اسي عليكم الله اللهم يشتت منو ويبدد منو ومايخلي منو؟؟؟
*خليهم اهل الانقاذ
*القبالهم كلهم
*منو الما اتدهور السودان في عهد حكمو؟؟؟
*والبعد الانقاذ
*منو الحكمنا وماشتتنا شتتا وبددنا بددا وماخلي فينا زول؟؟؟
*ياخ اسوأ انواع الموت لمن تكون ميت وماعارف
*قايل روحك حي
*اسي كلنا الماميت فينا وقايل روحو حي منو؟؟؟
*غير فولكلر ما اعتقد
*لذا حقو مانبكي علي لبن وفره لنا الاستعمار وخته لينا البزازة في قداديمنا ثم سكبناهوا برانا
*كشحناهوا لاننا بدل كلو زول فينا يركز علي بزازتو
*كنا حسادة كدة مركزين علي بزازات الغير والحسد يكاد يقتلنا
*فوقعت بزازاتنا وانكسرت واتدفق اللبن
*اللبن الكان مكبوب بقي مسكوب
*ياخ حسادتنا وصلتنا لدرجة نخلي اتفاقية الميرغني قرنق تقوم
*ويضيع السودان الوطن الواحد
*والوطن زي الضرس
*لما ينترم باقيهو كلو بتترم الي ان يكمل الضرس ويعدم الخشم السن ويبقي زي(الاباط)
*ياخ من قصص الحسادة البنضحك لما نسمعها
*القصة البتقول اتنين اصحاب ماشين في الخلا
*لاقاهم جن
*قال ليهم شبيك لبيك
*اي واحد فيكم يطلب طلب احققو ليهو
*الاول قال ليهو داير مراح ضان
*الشيطان هترش كدة
*ومراح الضان جا
*الشيطان اتلفت علي التاني وقال ليهو اطلب
*التاني قال ليهو داير لي مراح مرافعين
*الشيطان استغرب
*قال للزول مراح مرافعين داير بيهن شنو؟
*قال ليهو بدورن ياكل ضان رفيقي ده
*اسي دي امة تبني وطن؟؟؟؟
*عرفتوا ليه الخواجات ديل ركبوا القطر وشتتوا؟
*،اها
*نجي لي شمارات والي الخرتوم
*كان شفت يا والينا
*امس حلمت ليك بفولكلر لابس المرقع زينة في زينة وبقرأ بالرتينة
شمارات الكلب
ننساك كيف والكلب قال انا ذاتي امس حلمت ليك بعساكر كتااار محاوطين حلايب والمصريين جاريين وبكوركوا في عرضك يابيه ويا لهووووي…قمت صحت لقيت ناس النفايات شالوا الكيس القافل عليهو
والي لقاء
سلك
