*سمعنا تحت تحت انو اي حزب رشح رئيسا للوزراء من قياداته
*وطبعا حاتقوم الشمطة لحظة اختيار احدهم
*ولاننا في مرحلة تستوجب الوحدة والتكاتف
*وحتي لاتتشتت الاحزاب في هذه المرحلة بسبب كرسي رئيس الوزراء
*وطالما نسينا كفاءات ورجعنا لي حزبيتنا القدت مكنتنا
*انا اقترح ان يكون منصب رئيس الوزراء مكون من خمسطاشر شخصية
*ونسميهو مجلس رئيس الوزراء
*ونكون مجلس الوزراء من وزير واحد
*هو وزير مجلس رئاسة مجلس الوزراء
*تبقي سياستنا زي بعثاتنا الرياضية
*خمسطاشر اداري ولاعب واحد
*نعم ريسين غرقوا المركب
*ولكن مركب السودان الشبعت غرق لن يخيفها الخمسطاشر ريس
*تخاف من شنو وهي حاتله في قاع النهر دهورا
*بعدين وزير واحد كفاية
*وزير رئاسة مجلس رئيس الوزراء
*يشوف مخصصاتهم وحوافزهم وسفرياتهم ونثرياتهم
*تاني مامحتاجين وزير
*لانو عمرنا العامر ما استفدنا من وزير
*ده اذا ماضرانا
*اسي المالية مثلا
*موش اخير تكون من غير وزير بدل البعمل فيهو الوزير ده؟
*وزير صحة دايرين بيهو شنو في بلد قطن طبي مافيها
*ياخ بلد مرضاها خلوا اغنية البنسلين ياتمرجي نادوا الحكيم ياتمرجي
*الحكيم ينادوهوا لي شنو اذا كان الفحص البعملوا ليك تعملوا بره
*الصورة البكتبها ليك تعملها بره
*الروشته البكتبها لابتلقاها جوة ولا بتلقاها بره
*بالحاصل ده كلو وزير صحة لي شنو؟
*زيادة صرف سااااي؟
*تتذكروا وزير الصحة لما قال بنجيب علاج السرطان والعيانين بموتوا؟
*تتذكروا الزول ده؟
*اها في المبادرة قاعد وش
*يبقي مااعتقد في لزوم لوزير صحة
*وزير معادن لي شنو؟؟؟
*نحنا مستفيدين شنو من وزارتو؟
*منصب زي ده لو ضروري تتولي الصرف عليهو روسيا
*نحنا المعادن دي شعرا ماعندنا ليهو رقبة
*وموضوع لاناقة لنا فيه ولاجمل
*روسيا ست الرقبة والجمل تتولي الصرف علي الوزارة دي اذا بقت ضرورة واتعملت
*وزارة التعليم
*طبعا دي بالذات مفروض مانعملها
*لانها للاسف بتشوه وجه اعظم مهنه في التاريخ واعظم رسالة
*رسالة التعليم
*وزارة الداخلية
*هي هييييي
*داخلية وباكوبي في البلد؟
*داخلية بالدا !!!!!
*ماسكة مساحة ساي في شارع النيل
*وزارة الدفاع
*وااااااااي
*ضحكتني
*الدفاع بالنظر؟؟؟
*وزارة زي دي لو دايرين نعملها يا نقيم مبانيها في حلايب
*يامافي داعي للكضب والصرف الساي
*وزارة الرعاية الاجتماعية
*لو الوزير من اهل الوجعه وشماسي بالحاصل حاسي
*مرحبا بها
*غير كدة مافي داعي للصرف الساي
*وزارة الطاقة
*ضحكتني يا انت
*طاقة ونفاج؟؟؟؟
*عليكم الله دي وزارة دايره وزير ووكيل وصرف؟؟؟؟
*هاك الحلبة دي
*بالدخن
*قال طاقة قال
*وزارة الري
*احي الري
*اذا كان مشروع الجزيرة عطشان
*يبقي مافي داعي نجيب سيرتها
*وزارة الطرق والجسور
*وزارة الشؤون الهندسية
*وتخطيط المدن
*ومرابيع الشريف غرقت عشان الزلط الاعلي من البلد ومافيهو كباري تحتها مجاري تودي السيول للنيل
*ديل اسكتوا بس
*خفير كتير خليهو وزير
*اما بنك السودان
*الشغلو الاساسي تصديق طباعة العملة وزيادة الطين بلة
*فهو الذي بل الجنيه
*وهو سبب ترك المواطن لبنكك والاعتماد علي تنكك
*سياسات تخوف من التعامل مع البنوك
*لذا
*وزير واحد نسميه وزير وزارة مجلس رؤوساء الوزراء كفاية
*مامحتاجين وزارات ولا وزراء
*اها
*نجي لي شمارات والي الخرتوم
*كان شفت يا والينا
*وزير ماتعمل لينا
*وزير دي بتشبه زير وزير معناتها لمة كيزان
*تااااااني يا والينا !!!!!!
شمارات الكلب
ننساك كيف والكلب قال الشارع رئيسا للوزراء وكل مواطن وزير في مجالو….العسكر للثكنات والسياسيين يشوفوا ليهم شغلة بدل العطالة الهم فيها دي
والي لقاء
سلك
